د الله تعالی او د هغه د رسول صلی الله عليه وسلم اطاعت او پیروي کول په اسلام کې یو مهم اصل او بنسټ دی، او یو بنده تر هغه مسلمان کېدی نشي تر څو چې هغه د الله تعالی او د هغه د رسول صلی الله عليه وسلم اوامرو ته غاړه ایښودونکې نشي، او دا عقیده ولري چې د الله تعالی او دهغه د رسول صلی الله عليه وسلم اطاعت او پیروي کول فرض دي، نو هغه خلک چې د الله تعالی او د هغه د رسول صلی الله عليه وسلم اطاعت او پیروي کوي داسې کامیابي ورپه برخه کېږي چې د الله تعالی رضامندي، رحمت او لوی فضل په لاس ورځي، او له دردناک عذاب څخه خلاصی مومي، او هغه څوک چې د الله تعالی او د هغه د رسول صلی الله عليه وسلم له امر او احکامو څخه سر غړونه کوي او ورڅخه مخ اړوي نو داسې خلک په ښکاره تاوان باندې تاواني کېږي، او ځان د الله تعالی قهر او عذاب ته وړاندې کوي.
او هغه څوک چې دا عقیده لري او ګومان کوي چې د الله تعالی او د هغه د رسول صلی الله عليه وسلم اطاعت او پیروي پرې فرض نه ده، نو داسې بنده مسلمان کېدی نشي؛ ځکه الله تعالی فرمایي: ﴿وَمَا كَانَ لِمُؤْمِنٍ وَلَا مُؤْمِنَةٍ إِذَا قَضَى اللَّـهُ وَرَسُولُهُ أَمْرًا أَن يَكُونَ لَهُمُ الْخِيَرَةُ مِنْ أَمْرِهِمْ ۗ وَمَن يَعْصِ اللَّـهَ وَرَسُولَهُ فَقَدْ ضَلَّ ضَلَالًا مُّبِينًا ﴾ [الأحزاب: 36].
ترجمه: هېڅکله روا نه دي هېڅ مؤمن سړي او نه مؤمنې ښځې ته دا کار – چې کله په یو کار کې الله تعالی او د هغه رسول صلی الله عليه وسلم یوه فیصله وکړي -نو دغه مؤمن سړی او مؤمنې ښځې ته بیا په دغه کار ددوﺉ کې د بل اختیار لټونه روا نه ده، او هغه څوک چې سرغړونه وکړي د الله تعالی او دهغه د رسول صلی الله عليه وسلم څخه، نو بیشکه دی بې لارې شو په بې لاریتوب ښکاره سره له حق نه.
همداراز الله تعالی د خپل کتاب په بل ځای کې فرمایي:
﴿يَٰٓأَيُّهَا ٱلَّذِينَ ءَامَنُوٓاْ أَطِيعُواْ ٱللَّهَ وَأَطِيعُواْ ٱلرَّسُولَ وَلَا تُبۡطِلُوٓاْ أَعۡمَٰلَكُمۡ ﴾ [محمد: 33].
ترجمه: «ای مؤمنانو تاسو پیروي وکړﺉ د الله تعالی او پیروي وکړﺉ د هغه د رسول صلی الله عليه وسلم، او خپل عملونه- د الله تعالی او د هغه د رسول صلی الله عليه وسلم په نافرمانۍ او سرغړونه- مه باطلوﺉ.
او همداراز الله تعالی د خپل کتاب په بل ځای کې فرمایي:
﴿وَأَطِيعُواْ ٱللَّهَ وَٱلرَّسُولَ لَعَلَّكُمۡ تُرۡحَمُونَ ﴾ [آل عمران: 132].
ترجمه: او پيروي وکړﺉ – ای مومنانو – د الله تعالی او دهغه د رسول صلی الله عليه وسلم؛ ددې لپاره چې پر تاسو باندې د الله تعالی رحم وکړی شي.
همداراز الله تعالی په بل ځاي کې فرمایي:
﴿وَمَن يُطِعِ ٱللَّهَ وَرَسُولَهُۥ يُدۡخِلۡهُ جَنَّٰتٖ تَجۡرِي مِن تَحۡتِهَا ٱلۡأَنۡهَٰرُ خَٰلِدِينَ فِيهَاۚ وَذَٰلِكَ ٱلۡفَوۡزُ ٱلۡعَظِيمُ * وَمَن يَعۡصِ ٱللَّهَ وَرَسُولَهُۥ وَيَتَعَدَّ حُدُودَهُۥ يُدۡخِلۡهُ نَارًا خَٰلِدٗا فِيهَا وَلَهُۥ عَذَابٞ مُّهِينٞ ﴾ [النساء: 13-14].
ترجمه: او هغه څوک چې پیروي او اطاعت کړي د الله تعالی او د هغه د رسول صلی الله عليه وسلم نو الله تعالی به يې داسې جنتونو ته ننباسي چې د ماڼیو لاندې يې ویالی بهیږي، په داسې حال کې چې همیشه به وي دوﺉ په دغه جنتونو کې او همدا لویه کامیابي ده، او – ددې په عکس – هغه څوک چې مخالفت او سرغړونه وکړي د الله تعالی او د هغه د رسول صلی الله عليه وسلم، او د الله تعالی له حدودو څخه تیر شي، نو الله تعالی به يې اور ته ننباسي، په داسې حال کې چې همیشه به وي دوﺉ په دغه اور کې، او ددې سره سره به ددوی لپاره سپکونکی عذاب هم وي.
