همدغه شان الله تعالی په بل ځاي کې فرمایي:
﴿وَمَن يُطِعِ ٱللَّهَ وَٱلرَّسُولَ فَأُوْلَٰٓئِكَ مَعَ ٱلَّذِينَ أَنۡعَمَ ٱللَّهُ عَلَيۡهِم مِّنَ ٱلنَّبِيِّۧنَ وَٱلصِّدِّيقِينَ وَٱلشُّهَدَآءِ وَٱلصَّٰلِحِينَۚ وَحَسُنَ أُوْلَٰٓئِكَ رَفِيقٗا * ذَٰلِكَ ٱلۡفَضۡلُ مِنَ ٱللَّهِۚ وَكَفَىٰ بِٱللَّهِ عَلِيمٗا ﴾ [النساء: 69-70].
ترجمه: «او هغه څوک چې پیروي او اطاعت وکړي د الله تعالی او د هغه د رسول صلی الله عليه وسلم نو دوﺉ به د الله تعالی د هغه نیکانو بندګانو سره یوځاي وي چې الله تعالی ورباندې خپل نعمت کړی دی، چې هغوﺉ پیغمبران، صدیقین، شهیدان او نور نیکان بندګان دي، او همدوﺉ ډیر ښه دي په ملګرتوب کې، او دا کار مهرباني ده د الله تعالی لخوا، او الله تعالی کافي دی په علم او پیژندلو د خلکو او د هغوﺉ د اعمالو او رفیقانو کې.
همدارنګه الله تعالی په بل ځاي کې فرمایي:
﴿وَمَن يُطِعِ ٱللَّهَ وَرَسُولَهُۥ فَقَدۡ فَازَ فَوۡزًا عَظِيمًا ﴾ [الأحزاب: 71].
ترجمه: او هغه څوک چې پیروي وکړي د الله تعالی او د هغه د رسول صلی الله عليه وسلم نو بېشکه دی کامیاب شو په لوۍ کامیابۍ سره.
همداډول الله تعالی په بل ځای کې فرمایي: ﴿وَمَن يَعۡصِ ٱللَّهَ وَرَسُولَهُۥ فَإِنَّ لَهُۥ نَارَ جَهَنَّمَ خَٰلِدِينَ فِيهَآ أَبَدًا ﴾ [الجن: 23].
ترجمه: او هغه څوک چې مخالفت و سرغړونه وکړي د الله تعالی او د هغه د رسول صلی الله عليه وسلم نو یقیناً دده لپاره د جهنم اور دی په داسې حال کې چې دوی به په دغه اور کې همېشه وي د تل لپاره.
او په بل ځای کې بیا فرمایي:
﴿مَّن يُطِعِ ٱلرَّسُولَ فَقَدۡ أَطَاعَ ٱللَّهَ﴾ [النساء: 80].
ترجمه: او هغه څوک چې د رسول الله صلی الله عليه وسلم اطاعت او پيروي کوي، نو هغه په دغه پیروۍ سره د الله تعالی پیروي کوي.
او د رسول الله صلی الله عليه وسلم د پیروۍ په اهمیت کې الله تعالی په بل ځاي کې فرمایي:
﴿وَمَآ ءَاتَىٰكُمُ ٱلرَّسُولُ فَخُذُوهُ وَمَا نَهَىٰكُمۡ عَنۡهُ فَٱنتَهُواْ﴾ [الحشر: 7].
ترجمه: او هغه څه چې تاسو ته یي رسول الله صلی الله عليه وسلم درکوي او تاسو ته پرې امر کوي نو هغه واخلئ او عمل پرې وکړﺉ، او هغه څه چې رسول الله صلی الله عليه وسلم تاسو ورڅخه منع کوي نو تاسو ورڅخه منع شئ.
نو دا ټول آیتونه په دی ښکاره دلالت کوي چې د الله تعالی او د هغه د رسول صلی الله عليه وسلم اطاعت او پیروي کول فرض دي، او هغه څوک چې د الله او د هغه د رسول صلی الله عليه وسلم اطاعت او پیروي کوي الله ورته د جنتونو او نعمتونو وعده ورکوي، او هغه څوک چې د الله تعالی او د هغه د رسول صلی الله عليه وسلم څخه مخالفت او سرغړونه کوي نو الله تعالی یې په دردناک عذاب سره ویروي.
او اطاعت او پیروي داسې کېږي چې اوامر ومنل شي او عمل پرې وشي، او هغه شیان چې ورڅخه منع راغلې وي بنده ورڅه ځان وساتي، او همدا د دین اصلي حقیقت دی، او هغه دا چې د الله تعالی په اوامرو عمل وشي، او هغه څه چې ورڅخه یي منع فرمایلی ده ورڅخه ځان وژغورل شي.
او الله جل جلاله دا دین مونږ ته آسان کړی دی، او مونږ يي په داسې څه مکلف کړي نه یو چې زمونږ له توان څخه بهر وي، بلکې په هغه څه مو مکلف کوي چې زمونږ په توان کې وي، لکه چې الله جل جلاله په خپل کتاب کې فرمايي:
﴿فَٱتَّقُواْ ٱللَّهَ مَا ٱسۡتَطَعۡتُمۡ﴾ [التغابن: 16].
ترجمه: د الله تعالی څخه هومره ویریږﺉ چې ستاسو په طاقت او توان کې وي.
همداشان الله تعالی فرمايي:
﴿لَا يُكَلِّفُ ٱللَّهُ نَفۡسًا إِلَّا وُسۡعَهَا﴾ [البقرة: 286].
ترجمه: نه مکلف کوي الله تعالی هېڅوک مګر په اندازه د توان د هغه.
او په بل ځای کې فرمایي:
﴿وَمَا جَعَلَ عَلَيۡكُمۡ فِي ٱلدِّينِ مِنۡ حَرَجٖ﴾ [الحج: 78].
ترجمه: او نه ده ګرزولی الله تعالی په تاسو باندې په دین کې کومه سختي.
او د رسول الله صلی الله عليه وسلم څخه ابوهریره رضي الله عنه روایت کوي چې بیشکه رسول الله صلی الله عليه وسلم فرمایلي دي: «إِنَّ الدِّينَ يُسْرٌ وَلَنْ يُشَادَّ الدِّينَ أَحَدٌ إِلاَّ غَلَبَهُ». [رواه البخاري].
ترجمه: بیشکه دا دین آسان دی، او هیچا له دین سره زور نه دی ویلی مګر دین ورباندې غالب شوی دی.
او د ابو هریره صلی الله عليه وسلم په بل روایت کې له رسول الله صلی الله عليه وسلم څخه راغلي دي چې رسول الله صلی الله عليه وسلم فرمایلي دي: «إِذَا نَهَيْتُكُمْ عَنْ شَيْءٍ فَاجْتَنِبُوهُ، وَإِذَا أَمَرْتُكُمْ بِأَمْرٍ فَأْتُوا مِنْهُ مَا اسْتَطَعْتُمْ». [متفق عليه].
ترجمه: هغه څه چې زه تاسو ورڅخه منع کوم نو تاسو ورڅخه ځان وساتئ، او هغه څه چې تاسو ته پرې امر کوم نو څومره چې مو توان وي عمل پرې وکړﺉ.
